Bloggað fyrir mig

Ögmundur Jónasson heldur áfram að leika sér að eldinum. Hann er þver og heldur áfram að vera á móti Icesave, þrátt fyrir allt sem á undan er gengið. Það er erfitt að skilja ástæðurnar fyrir því, sú eina sem er augljós er þvergirðingshátturinn.

Ögmundur fullreyndi að fá stjórnarandstöðuna með í málið í sumar. Hún sveik hann herfilega, Framsókn greiddi atkvæði á móti og Sjálfstæðismenn sátu hjá. Ögmundur yppti bara öxlum við þau svik. Samt var augljóst að slagkraftur fyrirvaramálsins hefði verið allt annar ef allir alþingismenn hefðu greitt atkvæði með málinu. Sem var auðviðað bakbeinið í öllu uppleggi Ögmundar -- en ekki heyrðist styggðaryrði frá honum til þeirra sem sögðust ætla með honum í þá vegferð og fóru hvergi.

Stjórnarandstaðan, sá hluti hennar sem hefur staldrað við og hugsað málið, sem eru nú alls ekki allir, veit fullvel að það er engin önnur leið í stöðunni en að samþykkja Icesave og veit að það hefur aldrei verið nein önnur leið. Þegar Icesavesamningurinn kom með 7 ára biðleiknum var ljóst að þetta var eitthvað sem var góður möguleiki að ráða við. Stjórnarandstaðan, sá hluti hennar sem er raunsær, veit þetta og þess vegna að koma höggi á ríkisstjórnina og þá um leið er hún auðvitað að skapa Íslandi ómæld vandræði. (Og Icesave hefur aldrei snúist um lagatæknileg atriði, eða peningaþjark, heldur um pólitík og þá staðreynd að þjóðir Evrópu geta ekki sætt sig við þjófnaðinn sem í þessu fólst)

Tafirnar á þessu máli eru gífurlega dýrkeyptar. Það er gersamlega ómögulegt að spá fyrir um gengi krónunnar en ég er viss að þær líkur eru meiri en minni að hefði Icesave verið samþykkt strax í sumar hefði gengið styrkst. Það fer að sjálfsögðu allt eftir því hvað það hefði verið mikið, hversu margir milljarðar og tugmilljarðar hefðu sparast fyrir íslensk heimili með lægra vöruverði, lægri verðbólgu og þar af leiðandi lægri afborgunum af lánum verðtryggðum sem og gjaldeyrislánum. Gífurlegar upphæðir. Það hefði einnig aukið fólki bjartsýni og flýtt fyrir endurreisn bankanna og endurreisn efnahagslífsins.

Þessi töf verður aldrei metin til fjár en ég er sannfærður um að upphæðirnar eru hærri en sem nemur Icesave með öllum vöxtunum

Það þarf ekki að minnast á orðspor þjóðarinnar. Það þarf ekki að minnast á að það eru Svíar sem standa fremstir í flokki þeirra sem segja að engin aðstoð berist Íslendingum nema fyrst sé gengið frá Icesave. Þar kemur alkóhólistalíkingin inn í dæmið.

Þetta allt veit Ögmundur og hann er sár út í norrænu frændur okkar. En vill samt ekki setja sig í þeirra spor. Afhverju ekki?

En það sem er háskalegast hjá Ögmundi og þeim sem hann styðja innan Vinstri-gænna er sá leikur að eldinum sem snýr að framtíðar stjórn þessa lands.

Með atkvæðagreiðslunni í dag hjá honum og Lilju Mósesdóttur er eiginlega ljóst að Vinstri-græn eru ekki stjórntækur flokkur. Það verður ekki hægt að semja um stefnu ríkisstjórnar með Vinstri-grænum því einstakir þingmenn geta einfaldlega tekið stjórnina í gíslingu og unnið með stjórnarndstöðunni.

Möguleikarnir til stjórnarmyndunar verða líklegast þá þannig að það verður ekki hægt að mynda neina stjórn án þess að Sjálfstæðisflokkurinn eigi aðild að henni. Það er ekki þar með sagt að það þurfi að vera sérstaklega slæmt í sjálfu sér að flokkurinn sé í stjórn.

Nei, það sem er hættulegt er að flokkurinn verði í þeirri stöðu að nánast verði ekki mynduð stjórn án hans þátttöku. (Ögmundur og Lilja ættu líka að vita það að fyrir stjórnarþátttöku myndi Sjálfstæðisflokkurinn umsvifalaust samþykkja Icesave og með smá semingi gangast inn á aðild að Evrópusambandinu, það er bara ekki nokkur spurning)

Það sem Ögmundi og kó hefur þá tekist er að dæma Vinstri-græn úr leik um alla framtíð eftir að þessu stjórnarsamstarfi lýkur. Þetta veit líka Steingrímur J. og Jóhanna. Og líka koma Sjálfstæðisflokknum í algera lykilaðstöðu og þar með líka kom í veg fyrir uppgjör Sjálfstæðisflokksins við fortíðina og líka kemur það í veg fyrir að flokkurinn hverfi fá frjálshyggjuþjónkun sinni. Enda sést það á því hvernig flokkurinn hagar sér núna.

Og ef Ögmundur verður til þess að Icesave verði fellt eftir þriðju umræðu, þá verður fjandinn loks laus og skíturinn hittir viftuna fyrir alvöru einsog Ameríkanar myndu segja.

Stjórnarandstaðan segir nefnilega núna að varnaðarorðin hafi verið rugl, himin og jörð hafi ekki farist þótt ekki sé búið að samþykkja Icesave. Þar hafa þau rangt fyrir sér einsog yfirleitt alltaf í þessu máli. Himin og jörð ferst nefnilega ekki í einni svipan, það gerist hægt og rólega,

og með töfunum er það að gerast hægt og rólega einmitt núna, endurreisnin nær sér ekki á strik, orðstírin veikist og veikist og þegar upp verður staðið verður staða okkar meðal þjóða þannig að það tekur okkur tíu ár hið minnsta að vinna okkur út úr því. Á meðan verður hér allt í hægagangi. Það að himin og jörð hafi farist kemur ekki í ljós á morgun eða hinn, það kemur í ljós á næsta ári og þar næsta ári og þar þar næsta ári. Og miklu miklu fyrr ef Icesave verður fellt.

Það er ljóst að það væri alveg að æra óstöðugan að fara að blogga um Icesave.

En ég læt mig hafa það.

Hef einmitt verið að spá í það hvað hefði gerst hefðu menn nú bara samþykkt Icesve þegjandi og hljóðalaust í vor.

Það er alveg ljóst að önnur mál væru lengra komin. Það væri búið að fá stimpilinn frá Alþjóða gjaldeyrissjóðnum a.m.k. einu sinni ef ekki tvisvar. Búið að fá peninga og lánsloforð. Bara það hefði líklega þýtt styrkingu krónunnar í sumar, ómögulegt að segja hvað mikið, 5 prósent kannski, tíu jafnvel eða kannski enn meira. Það væri löngu búið að lækka vexti svo um munaði.

Hvað hefði það þýtt, jú minni verðbólga, lægra vöruverð, hærri kaupmáttur, lægri afborganir lána, bæði myntkörfulána og gengistryggðra lána. Sterkara atvinnulíf á Íslandi, færri uppsagnir, færri væru atvinnulausir og það myndi nú stefna niður á við, atvinnuleysið.

Ég er ekki viss um að krónan muni styrkjast mikið núna, ég held að við höfum jafnvel misst af lestinni, öll þessi umræða og allar þessar tafir hafa sýnt fram á hversu veikburða við erum og enn ýtt undir viðhorf manna til þess að krónan sé ekki merkilegur pappír. Held að menn séu bara búnir að gefast upp.

Hefði málið verið samþykkt strax, hefði stjórnkerfið haft meiri tíma fyrir allt annað, fyrr hefði komið fram frumvarp um að taka á lánavanda heimilanna, til að fást við fjárlagafrumvarpið, vanda betur til niðurskurðar o.s.frv. Eitthvað af þessum frumvörpum hefðu svo verið rædd á þingi í september. Frumvarp Árna Páls væri líklega nú þegar samþykkt og hefði tekið gildi 1. október, með lægri afborgunum fyrir skuldara.

Hefði þetta verið samþykkt strax, væri núverandi stjórn sterkari en hún er í dag. Nú vofir alltaf yfir henni að nokkrir þingmenn Vinstri-grænna taki hana í gíslingu. Útaf hvaða máli sem er. Ísland þarfnast nú frekar sterkrar stjórnar núna en veikrar. Það er ljóst.

Steingrímur væri heldur ekki jafn þreytulegur og hann er nú. Ég vil eiginlega frekar hafa hann hvíldan en svona eftir öll þessi átök. Og innanflokksátökin hafa örugglega tekið mest á hann.

Hefði þetta verið samþykkt strax væri þjóðin í betra jafnvægi. Flokkadrættir hefðu ekki hlaupið út í þetta svart/hvíta tilgangsleysi sem nú er upp komið. Tilgangsleysi sem við áttum að vera að vinna okkur út úr þessu. Menn hefðu kannski líka gengið betur að vinna að persónukjöri í næstu sveitarstjórnarkosningum og menn hefðu tekið stjórnlagaþing fastari tökum í sumar.

Með sterkari krónu sérstaklega, með bjartsýnni þjóð, með betra viðmóti í útlöndum væri staðan hreinlega allt allt önnur núna í dag en hún er -- allt allt önnur.

Og það sem verra er. Ég sé ekki hvað er svona frábært við þessa fyrirvara, hvort svo sem það eru nú þessir sem Alþingi samþykkti fyrst eða sem nú er búið að semja um. Lykilatriðið í samningnum hefur alltaf verið að það á ekki að borga næstu sjö árin. Það er aðalatriðið. Halda menn virkilega að Hollendingar og Bretar hefðu farið að ganga að Landsvirkjun og/eða Flugleiðum eða hvað menn hafa nú verið að nefna? Auðvitað ekki. Þrátt fyrir fruntaskap þjóðanna sem er náttúrulega tilkomin af því að allt Icesave málið er svívirðilegt, þá eru þetta siðaðar þjóðir. Við eigum ekki að óttast siðaðar þjóðir. Og líka þá var þetta aldrei, og verður aldrei, lagatæknilegt mál. Þetta er pólitístk mál. Nei ég sé ekki að annað en að niðurstaðan hefði orðið nákvæmlega sú sama með og án fyrirvara.

Ábyrgð stjórnmálamanna er mikil.

Í mbl.is í dag kemur fram að N1 hefur ákveðið að lækka bensínverðið um heila krónu. Og hver er ástæðan?

"Skýring lækkunarinnar er styrking krónunnar gagnvart Bandaríkjadollar, að því er segir í tilkynningu," segir í fréttinni.

Andskotans bull er þetta. Hér má sjá þróun gengis bandaríkjadals:



Gengið á bandaríkjadal er sem sagt búið að vera nánast það sama í meira en heilan mánuð! Samt er fyrst verið að lækka verðið núna og það um eina aumingjalega krónu. Og afhverju er Atlantsolía ekki búin að halda hinum við efnið með því að ganga á undan með lækkunum?

Er það þá heimsmarkaðverðið á olíu sem veldur því að menn hafi ekki lækkað? Nei það getur ekki verið. Þótt verðið hafi hækkað núna síðustu dag þá er það ekki hærra en fyrir mánuði síðan og var lægra í mánuðinum þannig að enn ríkari ástæða var til að lækka í miðjum mánuðunum en núna. Svei þeim.

Það virðast allir hafa áhuga á íslensku bankahruni sem margir kalla þjóðagjaldþrot.

Maður áttar sig samt ekki alveg á áhuga á þessari síðu sem kallar sig Pakistan Defence: Web's Authoritative Source on Pakistan Security.

En það er greinilega vissara fyrir varnarmálayfirvöld í Pakistan að fylgjast bæði með Al-kaída fólki og henni Jóhönnu Sigurðardóttur. Enda er hér um reglulegt eftirlit sbr. að þetta er "update".

Loksins góðar fréttir frá Íslandi segir sérfræðingur hjá TC Securities og bæði mbl.is og visir.is taka upp. Hér er frétt visis.is

"Beat Siegenthaler sérfræðingur í nýmörkuðum hjá TD Securities og stærsti miðlari krónubréfa segir að loksins séu að koma jákvæðar fréttir frá Íslandi. Á hann þar við brottvikningu Davíðs Oddssonar úr Seðlabankanum og skipan hinnar nýju Peningamálanefndar.

Þetta kemur fram í fréttabréfi Siegenthaler. Hann segir að eftir óvissu mánuðum saman um forystu Seðlabankans og „ljóta" baráttu milli bankastjórnar og minnihlutastjórnarinnar á Íslandi sjáist loksins jákvæðar fréttir frá Íslandi.

Hann ræðir um setningu Norðmannsins Svein Harald Øygard í embætti bankastjóra og skipun fagfólks í Peningamálanefnd og segir: „Þessar tilkynningar eru velkomin skref og munu hjálpa til við að endurvekja trúverðugleika Seðlabankans í augum erlendra fjárfesta.""

Þetta er það sem Davíð hundsaði algerlega, og setti alltaf eigin hagsmuni fram fyrir hagsmuni þjóðarinnar -- alltaf. Og ef hann gerði það núna, gerði hann það þá ekki alltaf??

Jónas Fr. brottrekni úr fme, segir svo í Fréttablaðinu í dag að þriggja mánaða töf hafi orðið á nauðsynlegum ákvörðunum, þar sem "stjórnmálamenn hafi farið að leita að sökudólgum til að beina athygli frá sér og skora jafnfram pólitísk stig". Þetta er nú ekki allskostar rétt hjá Jónasi. Það var fólkið í landinu sem krafðist uppgjörs, það voru mótmælendur á Austurvelli sem kröfðust þess að menn öxluðu ábyrgð, og þá ekki bara Jónas sjálfur heldur líka stjórnmálamenn. Það var ekki fyrr en þessi krafa var orðin svo hávær að pólitíkusar gátu ekki lengur lokað eyrunum fyrir henni að þeir fóru að reyna að slá pólitískar keilur.

En hefði ekki dregið mikið úr þessari vondu töf ef Jónas þessi hefði nú haft vit á því að víkja strax og sjálfur, þannig að það hefði ekki þurft að eyða öllum þessum tíma í að koma mönnum frá -- til þess að endurvekja nauðsynlegt traust.

Er ekki alveg ljóst að orðspor Íslands væri snöggtum skárra ef menn hefðu axlað sína ábyrgð strax í nóvember?

Er ekki rétt að reyna að læra af þessu?

Er ekki rétt að Ingibjörg Sólrún læri af þessu? En það virðist hún alls ekki hafa gert fyrst hún ætlar að halda áfram.

Það verður sko ekki af Hannesi Hómsteini skafið. Úr grein í New Yorker:

"In B5, the empty and fashinonable bar, Hannes Gissurarson, the author of "How Can Iceland Become the Richest Country in the World?" had said, "Ten or fifteen guys overreached themselves, they were out of control. But that is not the cause of the collapse". The primary cause, in Gissurarson's opinion, were the international credit crunch, the treachery of Gordon Brown-the "schoolyard bully"-and the failure of the European Central Bank to show Iceland support.

He also said, as if the thought were occurring to him for the first time, that it may be that "some of us are to blame indirectly, because we created a climate in which the entrepreneur was applauded. The businessman, the guy who takes over companies, asset-stripping-he was a hero in Icelandic folklore that was created by some of us who strongly supported the free market". He went on, "Indirectly, I take some blame for it, but, if you think about it, it's not my fault. It's the fault of the left-wing intellectuals, who should have been giving a counter-view!"

Nei hrunið er aðallega einhverjum útlendingum að kenna, og svo 15 útrásarvíkingum og kannski pínu oggu frjálshyggjuliðinu en þá bara af því að vinstri menn mótmæltu ekki frjálshyggjunni nógu mikið.

Er hægt að finna betri rök fyrir hruninu en að vinstri menn hafi ekki verið nógu miklir vinstri menn, þeir gagnrýndu ekki HHG, Davíð og Geir nógu mikið. Snilld.

Er það ekki alveg stórkostlegt. Í vikunni sem Glitnir var tekinn yfir, og þið munið að þá var það einsog og Davíð væri aftur kominn í pólitík, hann var í forsvari fyrir þessu, kom fram fyrir hönd stjórnvalda, og hann fór á ríkisstjórnarfund. Fundinn þar sem hann varaði við því að bankarnir færu allir á hausinn innan tveggja til þriggja vikna.

Hann segist hafa stanslaust, án hvíldar og án þess að taka sér frí í tvö ár, hafa varað við hruni bankann. En stóra viðvörunin kom greinilega þarna á þessum ríkisstjórnarfundi.

Og viðbrögð Geirs Haarde við þessu: Og Davíð hafði rétt fyrir sér sagði Geir og ekki bara það, þeir voru farnir á innan við viku (mátti ekki greina stolt í röddu Geirs þegar hann þannig vitnaði í spádómsgáfu síns gamla foringja?).

(Geir finnst reyndar ekki að hann hafi neitt skellt skollaeyrum við þessum stanslausu viðvörunum seðlabankastjórans í tvö ár -- en það er önnur saga.)

En þetta er hreint bara stórkostlegt og ekkert annað.

Þetta er einsog ef ég leggði bílnum mínum efst í Kömbunum, setti í hlutlausan, tæki hann úr handbremsu og ýtti við honum og færi svo til lögreglunnar og segði að ég væri hreint viss um að það færi bíll útaf í Kömbunum á næstu mínútum.

Og löggan myndi náttúrulega verða afskaplega hissa á því hvernig ég hefði nú getað vitað þetta, þegar enginn annar hafði sagt neitt, og löggan myndi náttúrulega ekkert spyrja mig hvað ég hefði með málið að gera, jafnvel þótt þetta hefði verið "bankinn minn".

Það er enginn skortur á húsnæði í dag. Það er öllum ljóst. Fyrir löngu síðan þegar ég einu sinni sem oftar gekk um Hlemm leit ég upp á bygginguna sem er vestan við Hlemm. Þar sem Geirfuglinn átti einu sinni heima og einu sinni fyrir milljón árum var útibú Íslandsbanka. Þetta er fallegt hús, klassískt en "nýja" strætóbyggingin á torginu eyðileggur þessa fínu byggingu.

Á svipuðum tíma var verið að ræða um samgöngumiðstöð sem einu sinni átti að rísa í Vatnsmýrinni. Mér hefur aldrei fundist það heppileg staðsetning vegna þess að það er of langt í burtu frá miðbænum. Þegar maður fer til útland og tekur flugvallarrútuna í bæinn þá fer hún niður í bæ, ekki eitthvert langt utan miðbæjarins. Auðvitað þarf maður oft að taka leigubíl áfram en oft má labba á hótelið.

Sem sé þegar ég leit upp á þetta fallega hús datt mér í hug að þetta væri nú betri staðsetning fyrir BSÍ en BSÍ sjálft sem er út í mýri. Og núna þegar srætó er farinn að ganga út um allar koppagrundir yrði þetta enn flottara. Mín hugmynd væri að rífa þetta "nýja" hús og not húsnæði Geirfuglsins fyrir aðstöðu fyrir farþega, og þá væri pláss á torginu fyrir strætó og rútur líka.

Síðan mætti nota gamla BSÍ fyrir Iceland Express og innanlandsflug þeirra eða bara stækka það og nota fyrir flugstöð fyrir alla.

Það finnst mér.

Ein stór áhyggjufull en hamingjusöm fjölskylda:

Nú er búið að leggja fram frumvarp sem afnemur eftirlaunaósómann einsog og Valgerður Bjarnadóttir skýrði sér eftirlaunapakka Davíðs Oddssonar.

Nú virðist vera að koma í ljós að það sé bara einfaldlega hægt að afnema þessi ólög á fljótvirkan og einfaldan hátt. Ég skildi reyndar aldrei afhverju menn gerðu þetta ekki strax eftir að lögin voru sett eða amk fyrir næstu kosningar á eftir, þeas að afnema ósómann en sætta sig við að menn héldu áunnum réttindum.+

En nú erum við búin að heyra það árum saman að það sé svo flókið og erfitt mál að afnema þessi ólög. Af ýmsum óskiljanlegum og lítt skýrðum ástæðum. Mest talað um eignarréttarákvæði stjórnarskrárinnar og eitthvað í þá veru.

En þetta er sem sé samt hægt og lítur út fyrir að vera auðvelt. Hvað stóð þá í veginum áður, hvað stóð í veginum árum saman?

Getur það verið annað en Sjálfstæðisflokkurinn? Nei auðvitað ekki, því nú segir Sigurður Kári Kristjánsson að hann hafi viljað fara þessa leið og talað fyrir því.

Hmmm...